Kleipotkind by Wildsilences

Ek is in 2019 met Outisme ("Aspergers") gediagnoseer, en om as volwassene gediagnoseer te word, is dit asof alles skielik sin maak en jou hele lewe van voor af begin, maar ook asof jy begrafnis hou en rou oor die persoon wie jy nog altyd was, maar moes wegsteek (of "mask", soos hul in Engels sê) om "normaal" voor te kom vir die mense wat nie Outistiese eienskappe begryp of herken nie.

So ek dra hierdie album op aan mense soos ek wat eers as volwassenes gediagnoseer word; maar ook aan almal wat Neurodivers is en soms voel hoe die wêreld soos groot branders oor hul spoel.

En dan ook vir almal wat lief is en omgee en verstaan en geduld het en die diep, donker stiltes in mekaar raaksien; die skrywers, die musikante, die digters, die skilders, die kreatiewe siele wat so dikwels hul siele uitstort in hul werke.

Die titel, "Kleipotkind" kom van 'n gedig wat ek destyds geskryf het, na ek 'n miskraam gehad het. Dit was 'n baie swaar tyd in my lewe en dit is toe wat ek veral vir God en Jesus en die Heilige Gees weer van voor af leer ken het. Hierdie album is 'n gebed, my rou, my eerlike gesels met die Allerhoogste wat ek nooit werklik sal of kan verstaan nie, maar Wie vir my ken, elke krieseltjie van wie ek is, nog voor ek bestaan het.

Ek waarsku jou, die lirieke in die album is baie donker, en swaar, maar soms is die lewe 'n anker om ons nek in die diep see waarin dit voel of ons verdrink. Maar Jesus steek elke keer Sy hand uit en gryp my vas.
En al voel die donker duisternis soms asof dit vir ewig aanhou, weet ek, ek is nooit, ooit werklik alleen nie.

Hier is my gedig - die inspirasie vir die album:

"Liewe Jesus

wees asseblief
geduldig
as U my hoop
in stukke vind –
U is my Saligmaker
en ek U kleipot-kind"

Alle regte Voorbehou.
Gedig geskryf deur C. Jardine.

Tracklist

1.	Moenie van my vergeet nie	1:45

2.	Hou vas aan My	2:17

3.	Broos	2:37

4.	Ek is	1:44

5.	Hoekom is jy so bang	1:38

6.	Introvert	3:20

7.	Ongetiteld	2:16

8.	Rooikappie	1:22

9.	Slapende Geraamte	0:47

10.	Tussenin	1:40

11.	Verdwyn	3:51

12.	Wie Jy Is	2:05

13.	Woorde en Gedigte	1:15

14.	Wiegelied	1:45

15.	Storm	0:52

16.	Gebed	0:23

17.	Sommernet 'n improv	3:04

18.	Ek is (Abstrak Eksperimenteel)	4:28

19.	Cezanne VS YYPR - Die Stiltes van Jou Hart (Wildsilences Mix)	3:21

20.	Bonus: Ek is (Oorspronklike)	3:10

Credits

released February 5, 2025

Musiek geskryf, geproduseer en opgevoer deur Wildsilences.
Lirieke en gedigte geskryf deur Wildsilences

Behalwe Lied 19 - sien asseblief individuele lied beskrywing.

License