Doppelbett from Sozialplan by Schönholzer&Rüdisüli

Doppelbett

Sie chaufed sich es Doppelbett
so gross, me chönnt drin wohne
Zwei Federchärnmatraze
ei riese erogeni Zone
A de Kasse git’s en lange Chuss
Me wett jetz zäme wohne

Hüt, noch fascht
zwanzg Ehejahr
stahts gliiche Bett im Zimmer
Er liit rechts vom Gräbli
und sie liit links
ja, eigetli scho immer
Zwei Matratze hend’s mal
neui kauft
Und für d Nachttischlämpli Dimmer

Obwohl no alls bim Alte isch
dunkt’s beid i letschter Ziit
vor einte Siite i dem Bett
zur andre übre wiit
Im Dunkle fragt me sich
wer uf der andre Siite liit

S isch wie wenn
s Gräbli nadisna
würd zum ne Grabe wärde
En Spalt zieht sich
dur s Doppelbett
wie s Rhiital zmittst dur d Ärde
E Distanz so gross
me ghört sich chumm
Me redt jetz i Gebärde

En Sturmwind zieht
durs neue Tal
bringt beid Matratze z’schwebe
Ihn blasts nach links
sie flügt nach rechts
nüt cha sie zämehebe
Me winkt sich no
nes letschts Mal zue
Vergäbe

Das isch e furchtbar
trischti Gschicht
für all, wo no nöd wüssed
dass beid derwil i neue Städt
neue Zimmer, neue Bett
e neui Liebi küssed

• Alternative
• chanson
• folk
• independent music
• mundart
• rüdisüli
• schweiz
• schönholzer
• song-writing
• songwriter
• theatre
• Zurich