Hitzez pitz by Hitzez Pitz

Euskal Herriko artistak eta kultura eragileak Palestinaren alde.

ARTEAREN AHOTSA EZIN DA BASAKERIAREN
AITZINEAN ISILIK EGON
Munduko indiferentziaren isiltasun gorgarrian, Gaza deuseztatzen ari da. Erortzen den horma bakoitzarekin, istorio bat da hiltzen. Itzaltzen den begirada bakoitzarekin, memoria bat da desagertzen.
Guk, Euskal Herriko artista, musikari, margolari, artista plastiko eta kultura eragileok, ahots kolektiboa piztu nahi dugu, duda izpirik gabe genozidioa denaren aitzinean. Badu bi urte Palestina, eta bereziki Gaza, amesgaizto amaigabea bizitzen ari dela, gure begipean, gobernuen isileko konplizitatearekin, ezikusiarena egiten baitute edo, oraino okerrago dena, gerla makina elikatzen segitzen baitute.
Injustiziaren aitzinean altxatzen ez den arteak arima galtzen du. Gure instrumentuak, pintzelak, ahotsak eta lumak jendetasuna basakeriari nagusitzen zaion mundua marrazteko baliatu behar ditugu.
Sortzaileok gure garaiaren lekuko baldin bagara, nola hetsi begiak tragedia garaikide horren aitzinean?

ITXOIN ORDEZ, EKIN
Geldirik egoten diren nazioarteko erakundeen hipokrisiaren aitzinean, ez dugu gehiago itxoin nahi. Ez da gehiago asmoez mintzatzeko garaia, egiazki ekiteko tenorea da.
Beraz, nazioarteko ekimen nagusi bat sostengatzen dugu eta ikusgarri egin nahi dugu, Israelek Gazari ezartzen dion blokeoa hausteko eta hil ala biziko korridore humanitarioaren irekitzeko:
“Gazarantz goaz: lurretik, itsasotik eta zerutik.
Gaza-Sumudeko blokeoa hausteko lurreko taldeak, Gazarako mundu martxak (mundu zabaleko 25 ordezkaritza biltzen dituen nazioarteko ekimenak) eta Askatasunaren Flotillaren Koalizioak bat eginen dugula iragartzen dugu, Gazari inposatzen zaion blokeoa geldiarazteko ekimenen sostenguz. Nazioarteko beste ekimen eta erakunde batzuk ere barne hartzen dituen Koordinazio Batzorde komuna sortu dugu, ekain erdian Gazarantz pentsatuak diren mugimenduen arteko koordinazio eta jarraipen lana egiteko.
Munduan askatasun gose diren herri guziak ekimen horiekin bat egitera eta azkarki parte hartzera deitzen ditugu, blokeo zuzengabea hausteko eta palestinarren ondoan ekiteko.”

Xehetasunak hemen: https://marchtogaza.net/

Telegram elkarrizketa taldeak badira, herrialde bakoitzean mugimendua koordinatzeko eta martxan izena emateko:

- Espainia (honek EH azpitalde bat du): https://t.me/+Ywt_n1-x7nE5MDM0 (Bozeramailea: Saif
Abukeshek)

- Frantzia: https://t.me/+C7ar-4aI56kxZjhk Bozeramailea: Catherine Le Scolan-Quéré doktorea)

ARTEA: ERRESISTENTZIA ETA ELKARTASUN ARMA
Gure engaiamenduak ez dira hitz hutsak. Musika bilduma bat argitaratu dugu, prezio librean, herri palestinarraren alde: “Hitzez pitz”. Gure kolektiboko artistek sortu obra fisikoen salmenta ere antolatu dugu.
Hori guzia gaurdanik eskuragarri duzu hemen: https://hitzezpitz.bandcamp.com/
Gertakari bat antolatzea ere planteatzen ari gara, diru emaitzak biltzeko eta obra handiagoak saldu ahal izateko.
Bilduko dugun diru guzia bertan ari den GKE bati emanen diogu. Aldiz, oraingoz, GKE guziei lana oztopatzen dietenez, berantago erabakiko dugu, elkarrekin, zeini emanen diogun, laguntza bideratzeko eta banatzeko ukanen dituzten ahal eta gaitasunen arabera.

Funts horien kudeaketan eta banaketan gardentasun osoz jokatzera engaiatzen gara.

Zertarako balio du gure arteak, indiferentziaren hormak ezin baditu astindu?

Zertarako balio du gure sorkuntzak, isilarazten diren ahotsei ezin badie oihartzunik eman? Gizadia arriskuan dagoelarik altxatzeko dugun gaitasunaren araberakoa izanen da historiaren epaia.

NORMALIZAZIOARI UKO
Eskuin muturra, faxismoa, kolonialismoa eta zapalketa mota guziak ideien eta kulturaren arlora sartu dira gudura. Arteari eraso eginez, kritika eta erresistentzia ito nahi dituzte. Horregatik gara, hain zuzen, borrokatzera behartuak.
Irudimena kolonizatzen digun eta jendetasunez husten gaituen propagandari uko egin diezaiogun.
Basakeria normalizatzea errefusa dezagun.
Errealitateaz mintzatzeko, balia ditzagun eskatzen dituen hitzak.
Arteak zapalduen ahotsa goratu eta haien memoria babestu behar du.

Ekin dezagun orain. Bihar berantegi izanen da.

-----

Deskarga digitala nahi duzuna ordaintzea da, baina deskarga kode bat ere bidaliko diguzu dohaintza bat eginez gero beheko GKEren bati edo Gazako jendeari laguntzen dion erakunderen bati. Hitzez_pitz@disroot.org helbidera idatzi diguzu.

- Palestinian Children's Relief Fund pcrf.net
- ANERA anera.org
- Palestine Red Crescent Society www.palestinercs.org/en
- MSF/Doctors Without Borders doctorswithoutborders.org
- Palestine Legal palestinelegal.org
- UNWRA www.unrwausa.org/donate
- The Sameer Project https://linktr.ee/thesameerproject

------

IZENPETZAILEAK

EHZ, USOPOP, BILAKA, COLLECTIF MOÏ MOÏ, ZÜZÜLÜ, BORDERLINE FABRIKA, MUSIQUE D’APERITIF, DIA! RADIO, UDADA FESTIBAL, MAITA KULTURA, COMBUSTIBLE, COLLECTIF BALLEPERDUE, RTZ, ORBEL, PALECOAL, LUMI, EKHI LAMBERT, MAKJAK, HAIRA, RÜDIGER, NAKAR, MÄIRÜ, IZAKI GARDENAK, FUSIBLE, EKIZA, WILLIS DRUMMOND, XIBEROOTS, LIBE, EZEZEZ, ZETKIN, XAK, BLOÑ, KASKEZUR, IBIL BEDI, PANGEA POP, GALDER, AUHEN, ØDEI, BILAU, HK, PANDA VALIUM, KUARTZ, GHAU, FULL CAB, KUMA NO MOTOR, VENIL, MANON BOULART, CALYPSO, GAU TXORI, XAB XAB, MANU BERK, FRANÇOIS MATON, NINA GARCIA, GUILLAUME FAUVEAU, iF MATXIKOTE JORAJURIA, EIDER BEOBIDE, JOSEBA IRAZOKI, XUTIK, JOSEBA B. LENOIR, MICE, SABINA HOURCADE, BENJAMIN ARTOLA, ANNE-LAURE GARICOIX, AMORANTE, TATXERS, DOM CAPISTRON, AKts, ELIANE HEGUIAPHAL

EUSKAL HERRIKO ARTISTAK ETA KULTURA ERAGILEAK PALESTINAREN ALDE.